القسم : مشكلات العلاقات الأسرية
العنوان : انا في حيرة شديدة من امري
عدد القراء : 2669

الإستشارة :انا في حيرة شديدة من امري , ارجوك ساعدني ارجوك انا طالب في اخر سنة في الطب , عندي 4 خوات واخ واحد , وابوي وامي , اختي الكبيرة تزوجت وعلى وشك الطلاق , وهي الحين تدرس ماجستير في احد التخصصات في الجامعة , واختي الثانية متزوجة وحالها مستور ولله الحمد , وبعدين انا وباقي اخوتي , والحمدلله وضعنا المادي متوسط ومستور الحال المشكلة اللي انا فيها بين ابوي واختي الكبيرة , ابوي شكاك ويبغى يعرف كل شي وكل صغيرة وكبيرة في الحال , يراقب اتصالات اختي ويشك كثير فينا كلنا , اقلها ستارة المجلس يلاقيها موخرة يقوم يخاصم البنات يقول لا تتفرجون مع الشباك , ولقي رقم غريب في فاتورة اختي اكثر اللي بينهم رسايل , المكالمات قليلة ومدتها بعد قليلة ماتتعدى الدقيقة , بس كلها من بعد صلاة العشا الين الفجر , واختي دايم حاطه جوالها عالصامت ولابتوبها محد يقدر يدخله, هي عندها بنت صغيرة وتقول ان بنتها دايم تلعب في الجوال وتخرب في الكومبيوتر وجا ابوي يسالها عن الرقم قلت لا انا اسالها , ابوي اتصل اول على الرقم وطلع رجال, واخذتها هي وبنتها ورحنا نتمشى وتعشينا برا , واثناء التمشية سالتها وقالت انه رقم لصاحبتها ولزوجها مشترك بينهم وبعدين جلست تبكي تقول ليه تشكون فيني وليه ابوي يتجسس علي واذا مو مصدقيني خل ابوي ياخذ السكين ويذبحني فشلتوني مع الناس واذا بتستمرون على هالحال ليتني جلست مع زوجي مذلولة عالاقل ذله ولا ذلكم ومن هالكلام , احنا ماعندنا سواق وابوي لسا موظف واختي شي طبيعي تداوم في الجامعة وابوي حالف يمين ماتروح وتجي مع باص ولا مع سواق , اختي الثانية متزوجة وتدرس ماجستير وزوجها مخليها تروح وتجي مع سواق بس ابوي مو راضي حتى تروح وتجي مع السواق اللي تروح معاه اختي الثانية ويقول مادامني حي مارح اخليها تركب مع احد غريب , واحيان يقول هذا اللي ناقص يقولون الناس بنت فلان تنزل وتركب مع واحد يستناها في الشارع , هذا بالله منطق ؟ وليته يوديها ويجيبها وقت ماتبي , لا , يوديها معاه من الساعة 7 ونص حتى لو دوامها الساعة 10 وفي الصرفة يلطعها الين هو يخلص دوام الساعة 2 ونص ولا اذا تاخرت في الخروج تحتريني الين اخلص عالساعة 4 واجيها واختي الله يهديها بعد اذا جا ابوي يكلمها على شي ترد بدال الكلمة عشر وترفع صوتها ولا فيه اي احترام لا لابوي ولا لامي, وعندي احساس يوم من الايام ابوي بيضربها . وتقول انا ماني صغيرة ابوي يتحكم فيني وانا اعرف مصلحة نفسي وامي الله يهديها مخلية البنات على كيفهم , حتى اختي الصغيرة في الابتدائي صارت تدخل الغرفة وتقفل الباب بالمفتاح , والنوم على كيفهم , انا ماالوم امي كثير لانها مو متعلمة , بس هي بعد تتضايق من كلام ابوي اذا خاصم البنات وعلمهم في شي يفيدهم وتقول خلهم , يمكن خايفة ان ابوي يكبر المشكلة لانه عصبي ودمه حار عشان كذا تقول خلهم اسرتنا كلها ضايعة بينهم , ليتها مادرست ماجستير احسن , يعني الى متى واحنا كل يوم يتكلمون فيه لازم يصير هواش ؟ كل ماقلنا زانت الامور رجعت اسوا , وانا الولد الكبير , هي تجيني تشتكي وابوي يجيني يشتكي وامي تجيني تشتكي منهم الاثنين وانا تعبت منهم كلهم وكل يوم ادعي ربي ينصلح الحال ارجوك ساعدني قلي وش اسوي , انا مليت منهم , الله يغفر لي بس ولا فيه احد يقول انه يمل من ابوه ؟ الله يسامحك يبوي خليتني اقول كذا , الله يسامحك ارجوك ساعدني في اقرب وقت ممكن